Etim bola — otasi ham, onasi ham vafot etgan yoki ular sud qaroriga asosan vafot etgan deb e’lon qilingan bola.
ota-ona qaramog‘idan mahrum bo‘lgan bola — ota-onalik huquqidan mahrum qilinganligi, bedarak yo‘qolgan yoki muomalaga layoqatsiz deb topilganligi, bolani tarbiyalashdan yoki uning huquq va manfaatlarini himoya qilishdan bo‘yin tovlaganligi, shu jumladan, uzrsiz sabablarga ko‘ra o‘z bolasini tug‘uruqxona yoki boshqa davolash muassasasidan, tarbiya, aholini ijtimoiy himoyalash muassasasi va shunga o‘xshash boshqa muassasalardan olishdan bosh tortganligi, tashlab (qoldirib) ketilgan yoki topib olinganligi sababli ota-onasi noma’lum bo‘lgan, yolg‘iz (ota) ona vafot etgan ota-ona qaramog‘idan mahrum bo‘lgan bola;
Etim bola va ota-ona qaramog‘idan mahrum bo‘lgan bolalarning uy-joyga bo‘lgan huquqni ta’minlash jarayonlarida ularning qonuniy huquq va manfaatlarini himoya qilish bo‘yicha Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari va Agentlikning hududiy boshqarmalari mas’ul organ hisoblanadi.
Biriktirilgan uy-joyga ega bo‘lgan etim bolalar va ota-ona qaramog‘idan mahrum bo‘lgan bolalar muqobil joylashtirish shakllarida va o‘quv-tarbiya muassasasida bo‘lgan to‘liq davrda, shuningdek, O‘zbekiston Respublikasi Qurolli Kuchlarida xizmatni o‘tash davrida yoki ozodlikdan mahrum qilish tariqasidagi jazoni ijro etish muassasalarida bo‘lgan davrida uy-joyga bo‘lgan huquqini saqlab qoladi.
O‘zlariga biriktirilgan turar joyga ega bo‘lmagan va turar joyga muhtojlar sifatida hisobda turgan etim bolalar va ota-ona qaramog‘idan mahrum bo‘lgan bolalarga ular 18 yoshga to‘lgandan keyin ko‘p kvartirali uy-joylardan umumiy maydoni 25 — 50 kvadrat metr oralig‘ida bo‘lgan, mazkur bolalar o‘rtasida nikoh tuzilgan hollarda, 50 — 70 kvadrat metr oralig‘ida bo‘lgan kvartiralar yoki mazkur kvartiralar narxidan ortiq bo‘lmagan narxda yakka tartibdagi turar joy (hovli) ajratiladi.
Agentlikning hududiy boshqarmalari uy-joy berish to‘g‘risidagi qarorini (buyruqni) qabul qiladi va tuman (shahar) hokimligiga etim bolalar va ota-ona qaramog‘idan mahrum bo‘lgan bolalarga ushbu Nizomga 2-ilovada belgilangan namunadagi orderni berish uchun yuboradi. Bunda tuman (shahar) hokimligi qaror (buyruq) kelib tushgan kundan boshlab bir ish kunida etim bolalar va ota-ona qaramog‘idan mahrum bo‘lgan bolalarga orderni rasmiylashtiradi va Agentlikning hududiy boshqarmalariga yuborilishini ta’minlaydi. Mazkur order berilgan uy-joyga ko‘chib kirish hamda rasmiylashtirish uchun asos hisoblanadi.
O‘zbekiston Respublikasi Vazirlar Mahkamasining qarori, 25.10.2021-yildagi 656-son