2026-yil 6-noyabrda soliq hisoboti shakllariga kiritilgan o‘zgartirishlar kuchga kirdi. Qo‘shilgan qiymat solig‘ini (QQS) soddalashtirilgan tartibda hisoblash va to‘lash uchun hisobot shakllari tasdiqlandi, yuridik shaxslarning yer solig‘i hisobotiga esa yangi bo‘limlar qo‘shildi.

Reyestrlarni qog‘ozda rasmiylashtirish

Tovar va xizmatlar bo‘yicha hisobvaraq-faktura reyestrlarini soliq davri tugaganidan keyingi oyning 15-kunigacha chop etish, varaqlarini raqamlash, tikish va muhr mavjud bo‘lsa, muhrlash majburiyati bekor qilindi.

Elektron shaklda yuritilgan qo‘shimcha varaqlarni ham chop etib, tegishli soliq davri reyestriga ilova qilish talab etilmaydi.

Soddalashtirilgan QQS uchun hisobot shakllari

Asosiy faoliyati umumiy ovqatlanish, savdo yoki xizmat ko‘rsatish bo‘lgan tadbirkorlik subyektlari 2030-yil 1-yanvarga qadar soddalashtirilgan tartibni ixtiyoriy tanlashi mumkin. Davlat ulushi 50 foiz yoki undan yuqori bo‘lgan korxonalar va yirik soliq to‘lovchilar bundan mustasno.

Soddalashtirilgan tartibda tovarlar va xizmatlarni sotish bo‘yicha barcha aylanmaga QQSning 6 foizlik stavkasi, foyda solig‘iga esa 0 foizlik stavka qo‘llanadi.

Tadbirkor ushbu tartibga o‘tish uchun soliq to‘lovchining shaxsiy kabineti orqali xabarnoma yuboradi. Yangi tartib xabarnoma yuborilgan oydan keyingi oyning 1-kunidan qo‘llanadi. Bu tartibda xarid qilingan tovar va xizmatlar uchun to‘langan QQS hisobga olinmaydi.

Yer solig‘i hisobotidagi yangi bo‘limlar

Yuridik shaxslarning yer solig‘i hisobotiga «Soliq solinadigan baza» va «Samarasiz foydalanishdagi yerlar» bo‘limlari kiritildi.

Huquqiy asos — 2026-yil 5-noyabrda 3221-10-son bilan davlat ro‘yxatidan o‘tkazilgan Soliq qo‘mitasi qarori va 2026-yil 26-maydagi PF–100-son Prezident farmoni.