2026-yil 7-noyabrda kuchga kirgan Prezident farmoni bilan jinoyatchilikni raqamli nazorat qilish, tahlil etish va prognozlash tizimini joriy etish belgilandi. Buning uchun Yagona kriminogen ma’lumotlar platformasi ishlab chiqiladi.

Platformaning vazifalari

Platformada jinoyatlarning obyektiv va subyektiv sabablari, ularni bartaraf etish choralari, mas’ul idoralar va mansabdor shaxslar haqidagi ma’lumotlar elektron reyestrda yuritiladi. Ko‘rilgan choralar natijalari oylik, yarim yillik va yillik davrlar bo‘yicha avtomatik nazorat qilinadi.

Tizim hududlar, mahallalar va jinoyat turlari kesimida yarim yillik va yillik prognozlarni shakllantiradi. Natijalar asosida kriminogen vaziyati og‘ir hududlarga vaziyatni barqarorlashtirish choralari ko‘rsatilgan xabarnomalar yuboriladi.

Sinov va joriy etish muddatlari

Platforma 2027-yil oxiriga qadar Toshkent shahrining Olmazor tumanida sinov tariqasida ishga tushiriladi. 2028-yildan boshlab uni mamlakatning barcha hududlarida bosqichma-bosqich joriy etish choralari ko‘riladi.

Yillik so‘rov va tadqiqotlar

Har yili aholi o‘rtasida jinoyatdan jabrlanish holatlarini o‘rganuvchi milliy viktimologik so‘rov o‘tkaziladi. Alohida ijtimoiy so‘rovda aholi o‘zini qanchalik xavfsiz his qilishi va huquqni muhofaza qiluvchi organlarga ishonchi o‘rganiladi.

Yoshlar, voyaga yetmaganlar, ayollar, muqaddam sudlangan shaxslar, probatsiya hisobida turganlar va «qizil» toifadagi mahallalar bo‘yicha har yili manzilli kriminologik tadqiqotlar ham o‘tkaziladi.

Huquqiy asos — O‘zbekiston Respublikasi Prezidentining 2026-yil 6-noyabrdagi PF–241-son farmoni.