Transport vositalari qiymatini baholashga oid yangi standart tasdiqlandi

O‘zbekiston Respublikasi Adliya vazirligi tomonidan Davlat aktivlarini boshqarish agentligi direktorining “O‘zbekiston Respublikasining Yagona milliy baholash standartiga qo‘shimcha va o‘zgartirishlar kiritish to‘g‘risida”gi buyrug‘i (ro‘yxat raqami 3487-2, 2025-yil 5-iyunь) davlat ro‘yxatidan o‘tkazildi.

Hujjat bilan 15-son “Transport vositalari qiymatini baholash” Milliy baholash standarti va unga oid metodika tasdiqlandi.

Ushbu standart asosida transport vositalarining qiymatini baholash va ularga etkazilgan moddiy zarar miqdorini aniqlashga doir talablar belgilandi.

Shuning, quyidagilar baholanadi:

• engil avtomobillar,

• yuk avtomobillari,

• avtobuslar,

• tirkamalar va yarim tirkamalar,

• maxsus texnikalar,

• qishloq xo‘jaligi va yo‘l-qurilish texnikalari,

• mototexnika (moped, skuter va boshqalar),

• velosipedlar.

Baholash uslublari:

▪️ Qiyosiy yondashuv – o‘xshash transport vositalari qiymati bilan solishtirish orqali;

▪️ Daromad yondashuvi – tijorat maqsadlarida foydalanilayotgan vositalar bo‘yicha kelajakdagi daromadlar asosida;

▪️ Xarajat yondashuvi – tiklash yoki almashtirish xarajatlari asosida, eskirish darajasini inobatga olgan holda.

Shuningdek, ushbu standartda shikastlangan transport vositalari qiymatini aniqlash va zarar miqdorini hisoblash tartibi ham belgilab berilgan