Bu haqda fuqarolik holati dalolatnomalarini ro‘yxatga olish qoidalariga kiritilgan hukumat qaroriga binoan o‘zgarishlar kiritildi.

Vazirlar Mahkamasining “Nikoh, oila va fuqarolik holati dalolatnomalarini ro‘yxatga olish sohasidagi normativ-huquqiy hujjatlarni tizimlashtirish to‘g‘risida”gi qaroriga kiritilgan o‘zgarishlarga ko‘ra, jinsini o‘zgartirish holati endilikda ism, familiya va otasining ismini (FIO) o‘zgartirish uchun asos bo‘ladi.

Endilikda jinsini o‘zgartirgan fuqaro ism, familiya va otasining ismini o‘zgartirish haqida ham ariza bera oladi. Buning uchun sog‘liqni saqlash muassasasi tomonidan jinsni o‘zgartirish to‘g‘risida berilgan tibbiy xulosa taqdim etilishi kerak.

“Masalan, Dilshod ismini hech qanday to‘siqlarsiz Dilshodaga o‘zgartirish mumkin”, – deb yozdi sobiq deputat Rasul Kusherbayev.

Avval (139-bandga ko‘ra) jinsini o‘zgartirgan taqdirda tug‘ilganlik, vafot etganlik, nikoh va boshqa guvohnomalarga o‘zgartirish kiritish mumkin edi, biroq ism-sharifni faqat tarixiy va milliy anʼanalar asosida, O‘zbekiston Respublikasi “Davlat tili to‘g‘risida”gi qonunning 15-moddasiga binoan o‘zgartirishga ruxsat berilgan edi.

Qoidalarning yangi tahririga ko‘ra, FIO quyidagi hollarda o‘zgartirilishi mumkin:

• O‘zbekiston Respublikasi “Davlat tili to‘g‘risida”gi qonunning 15-moddasiga muvofiq;

• Sud qaroriga asosan;

• Agar ism yoki familiya noxush yoki yoqimsiz eshitilsa;

• Agar ism yoki familiya milliylikka mos kelmasa;

• Istak bo‘yicha – turmush qurishdan oldingi familiyaga qaytish (turmush davrida yoki ajrashgach);

• Oila aʼzolari umumiy familiya olishni istasa (agar nikoh tuzilganida bunday familiya olinmagan bo‘lsa);

• Farzandlarning otasi, onasi, onaning turmushdan oldingi familyasi yoki o‘gay ota/vasiy familiyasini olishini istash holatida;

• 16 yoshga to‘lgan shaxs uchun otalikni belgilashda;

• Jins o‘zgartirilganda.