Hukumat qarori (365-son, 14.06.2025 y.) bilan “Davlat umumiy o‘rta taʼlim tashkilotlarida ayrim toifadagi o‘quvchilarni maktabdan tashqari taʼlimga jalb qilish tartibi to‘g‘risida”gi nizom tasdiqlandi. 

⇒ Nizom davlat umumiy o‘rta taʼlim tashkilotlarida ayrim toifadagi o‘quvchilarni qo‘shimcha taʼlimga jalb qilish hamda o‘qitish xarajatlarining 80 foizini Davlat byudjetidan qoplab berish tartibini belgilaydi.

⇒ Ayrim toifadagi o‘quvchilar Kambag‘al oilalar reyestridagi oilalarning umumiy o‘rta taʼlim tashkilotlarida taʼlim olayotgan farzandlari hisoblanadi.

⇒ O‘quvchilar to‘garaklarga ixtiyoriylik asosida jalb etiladi. 

⇒ O‘quvchilarning ota-onalari hamda taʼlim tashkilotlari o‘rtasida shartnomalar tuzish YIDXP (my.gov.uz) orqali amalga oshiriladi. 

Taʼlim tashkilotlari tomonidan ko‘rsatiladigan xizmatlar bo‘yicha 1 nafar o‘quvchiga har bir to‘garak uchun 1 oylik to‘lov quyidagi miqdorlardan oshmaydi:

► 7-11 yoshdagi o‘quvchilar uchun darsdan keyingi qo‘shimcha taʼlim (uzaytirilgan kun guruhlari) uchun BHMning 1 baravaridan;

► 12-18 yoshdagi o‘quvchilar uchun umumtaʼlim fanlari, 15-18 yoshdagi o‘quvchilar uchun xorijiy til yo‘nalishlaridagi to‘garaklar uchun BHMning 2 baravaridan;

► 15-18 yoshdagi o‘quvchilar uchun axborot texnologiyalari, kasb-hunar yo‘nalishlaridagi to‘garaklar uchun BHMning 4 baravaridan.

► To‘garak to‘lovining 80 foizi Davlat byudjetidan, 20 foizi o‘quvchining ota-onasi tomonidan to‘lanadi.