O‘zbekistonda piyodaga “maʼlum maqom” berish taklifi ilgari surildi

Yo‘l harakati xavfsizligi bosh boshqarmasi piyodalarga yoshga qarab alohida maqom berishni nazarda tutuvchi qonunchilik taklifini ishlab chiqqan.

Yo‘l harakati xavfsizligi bosh boshqarmasining masʼul xodimi Fazliddin Toshkenboyevning aytishicha, xalqaro amaliyotda piyoda uchun maxsus maqom berish tajribasi yo‘q.

«Maktabni bitirib, bitiruvchi maqomini olish uchun attestat kerak, institutini tugatib bakalavr bo‘lish uchun diplom kerak, fuqaro bo‘lish uchun — pasport. Nega piyoda uchun ham maqom bermaslik kerak? Axir ularning ham javobgarligi bor. Bunday narsa xorijiy amaliyotda ham yo‘q», — dedi u.

Uning taʼkidlashicha, bolalar bilan bog‘liq ko‘pgina YTHlar ular nazoratsiz qolgani uchun yuz beradi.

«Biz ko‘p hollarda haydovchilarni chaqirib, qoidabuzarlik yoki YTHlar yuzasidan ular bilan profilaktik suhbatlar olib boramiz. Lekin piyoda sifatida harakatlanuvchilar bilan hech kim ishlamaydi. Biz piyoda maqomini joriy etishni taklif qilyapmiz. Masalan, tashkilotlarda ishlaydigan fuqarolar piyoda harakatlansa, ularning ish joyi ana shu xodimlar bilan ogohlantirish ishlarini olib borishi va o‘z masʼuliyatini his qilishi kerak. Maktabda o‘quvchi bo‘lgan piyodalarga — maktab maʼmuriyati, bog‘cha yoshidagi yoki mahallada yashovchi bolalarga — ota-ona masʼul bo‘ladi. Mana shuni ko‘zlab loyiha ishlab chiqilgan», — dedi u.

 Loyihaga ko‘ra, piyoda maqomi yoshga qarab quyidagicha belgilanishi mumkin:

♦ 3–6 yosh — «Kattalar kuzatuvidagi piyoda»
♦ 7–11 yosh — “Bola-piyoda”
♦ 12–17 yosh — “O‘smir-piyoda”
♦ 17 yosh va undan kattalar — “Piyoda”