Hukumat qarori bilan transport vositalari egalarining fuqarolik javobgarligini majburiy sug‘urta qilish tizimiga o‘zgartirishlar kiritildi, deb xabar bermoqda Istiqbolli loyihalar milliy agentligi.

Shunday qilib, 2026 yil 1 yanvardan boshlab majburiy sug‘urta summasi hozirgi 40 million so‘mdan 80 million so‘mgacha oshiriladi.

"Bu YTH natijasida jabrlangan shaxslarning mol-mulki, hayoti va sog‘lig‘iga yetkazilgan zararni qoplashga yo‘naltiriladigan mablag‘larning zamon talablariga mos bo‘lishiga xizmat qiladi," - deyiladi xabarda.

Aktuar hisob-kitoblar asosida (aktuarlar sug‘urta mahsulotlari bo‘yicha tariflarni, zaxira talablarini, sug‘urta hodisalarining yuz berish ehtimolini hisoblaydi) sug‘urta tariflari qayta ko‘rib chiqildi, sug‘urta summasi va sug‘urta mukofotlari bozor tamoyillariga muvofiq belgilandi.

Shuningdek, haydovchilar soniga qarab cheklangan va cheklanmagan miqdorda polis rasmiylashtirish mexanizmi belgilandi. Bunda aybdor deb topilgan sug‘urta qildiruvchining sug‘urta daʼvolari va boshqa nizolarini sug‘urtalovchi tomonidan ko‘rib chiqish tartibi aniqlashtirildi.

Sug‘urta to‘lovlarini kafolatlash jamg‘armasiga transport vositalari egalarining fuqarolik javobgarligini majburiy sug‘urta qilish bilan bog‘liq masalalar bo‘yicha yuridik maslahatlar berish, shuningdek, yo‘l-transport hodisasi haqida xabardor qilish bilan bog‘liq adjasterlik xizmatlari ko‘rsatish vazifasi yuklatilgan.

Majburiy sug‘urta bo‘yicha majburiyatlar bajarilishini nazorat qilish uchun masʼul organlar va Yagona avtomatlashtirilgan axborot tizimini yuritish tartibi aniqlashtirildi. Majburiy sug‘urta bo‘yicha manfaatdor davlat idoralari bilan elektron axborot almashinuvini yo‘lga qo‘yish topshirildi.

Bundan tashqari, 2026 yil 1 apreldan boshlab Yagona sug‘urta billing tizimi joriy etiladi, u polislarni rasmiylashtirishda sug‘urta mukofotlari tushumlarining markazlashtirilgan hisobini taʼminlaydi.

Vazirlar Mahkamasiga fuqarolik javobgarligini majburiy sug‘urta qilishni rasmiylashtirmagan shaxslarni maʼmuriy javobgarlikka tortish mexanizmlarini takomillashtirishni nazarda tutuvchi qonun loyihasini kiritish topshirildi.