Hujjatlarning original nusxalari skaner qilingan holda avtomatlashtirilgan “Notarius” axborot tizimiga yuklanadi.  

O‘zbekiston Respublikasi Prezidentining qaroriga muvofiq:

2025 yil 1 dekabrdan boshlab, respublika hududida notarial tarzda tasdiqlangan nikoh shartnomalarining original nusxalarini notariuslar tomonidan talab qilish bekor qilinadi. Bu avtomatlashtirilgan “Notarius” axborot tizimiga ushbu hujjatlarning nusxalarini majburiy yuklash tartibining joriy etilishi orqali amalga oshiriladi.

Shu bilan birga, notarial harakatlarni amalga oshirish jarayonini audio va video yozuvlar orqali qayd etish va ushbu fayllarni notarial harakatlarga bevosita biriktirish hamda tizimda saqlash imkoniyati yaratiladi.

2026 yil 1 yanvardan boshlab, O‘zbekiston fuqarosining shaxsini tasdiqlovchi hujjatning originalini notariusga taqdim etish talabi bekor qilinadi.

Fuqarolarning shaxsiyati zamonaviy axborot texnologiyalari orqali, shaxsni tasdiqlovchi hujjat rekvizitlari asosida aniqlanadi va biometrik maʼlumotlar (barmoq izlari va Face-ID) orqali verifikatsiya qilinadi.

2026 yil 1 apreldan boshlab, ko‘chmas mulk va undagi ulushlar bilan bog‘liq barcha bitimlar notarius tomonidan davlat ro‘yxatidan o‘tkazish uchun avtomatlashtirilgan tizim orqali yuboriladi.

Ko‘chmas mulk obyekti davlat ro‘yxatidan o‘tkazilgandan so‘ng, uning yangi egasi haqidagi maʼlumotlar kommunal xizmatlar tashkilotlarining elektron axborot tizimlariga avtomatik ravishda yuboriladi va maʼlumotlar bazalarida yangilanadi.