Madaniyat va sanʼat sohasida boshqaruv takomillashtiriladi

“Madaniyat va sanʼat sohasida boshqaruv tizimini takomillashtirish hamda xususiy sektor ishtirokini rag‘batlantirish chora-tadbirlari to‘g‘risida”gi Prezident qarori (PQ–150-son, 21.04.2026 y.) qabul qilindi.

Qarorga ko‘ra, Madaniyat vazirligi tizimidagi madaniyat markazlari quyidagi shakllarda transformatsiya qilinadi:

► Madaniyat vazirligi tizimidagi madaniyat markazlari faoliyati nomoddiy madaniy merosni targ‘ib qilish, havaskorlik sanʼatini rivojlantirish, shuningdek, texnologiya, muhandislik, hunarmandchilik va boshqa yangi yo‘nalishlarda yo‘lga qo‘yiladi;

► tuman (shahar) hokimliklari tizimiga o‘tkaziladi;

► xususiy investitsiyalarni jalb etish va (yoki) ilg‘or boshqaruv tajribasini joriy etish maqsadida davlat-xususiy sheriklik asosida faoliyati yo‘lga qo‘yiladi;

► resurslardan oqilona foydalanish uchun samarasiz madaniyat markazlari faoliyati maqbullashtiriladi.

2026 yil 1 iyuldan “Tumor” davlat raqs ansambli” davlat muassasasi tashkil etiladi. 

Madaniyat bo‘limlari Madaniyat vazirligi tomonidan yuritiladigan reyting natijalari asosida rag‘batlantiriladi. Bunda:

► reyting 2027 yildan boshlab har yilning yakuni bo‘yicha yuritiladi hamda unda madaniy tadbirlarga aholi qamrovi va milliy qadriyatlarni asrash bilan bog‘liq ko‘rsatkichlarga ustuvorlik beriladi;

► reytingda eng yuqori o‘rinni egallagan madaniyat bo‘limlari Davlat byudjeti hisobidan rag‘batlantirib boriladi.

Madaniyat taʼlimi muassasalari rivojlantiriladi

Qarorga ko‘ra, 2026/2027 o‘quv yilidan Respublika musiqa va sanʼat texnikumi hamda Respublika estrada va sirk texnikumida:

► 2 yillik boshlang‘ich kasbiy taʼlim, 6 oydan 2 yilgacha bo‘lgan muddatda o‘rta kasbiy taʼlim hamda kamida 2 yillik o‘rta maxsus kasbiy taʼlim dasturlari asosida o‘qitish tizimi joriy etiladi;

► bakalavriat taʼlim dasturlari bilan integratsiyalashtirilgan “2+2” dasturlari asosida o‘qitishga ruxsat beriladi.

✅ Shuningdek, 2026/2027 o‘quv yilidan Madaniyat vazirligi tizimidagi ixtisoslashtirilgan sanʼat va madaniyat maktablarida:

► o‘quvchilar musiqa yo‘nalishida 5-sinfdan hamda raqs, teatr, xalq ijodiyoti, tasviriy va amaliy sanʼat yo‘nalishlarida 
9-sinfdan boshlab qabul qilinadi;

► maktab-internatlar uchun belgilangan amaldagi normalar tatbiq etiladi, jumladan, maktab o‘quvchilarining taʼlim olish va yashash xarajatlari to‘liq Davlat byudjeti hisobidan, ularni ovqatlantirish xarajatlari Davlat byudjeti hamda ota-onalar to‘lovi mablag‘lari hisobidan moliyalashtiriladi;

► Madaniyat vazirligi tizimidagi ixtisoslashtirilgan sanʼat va madaniyat maktablari hamda maktab-internatlarning bitiruvchilariga bolalar musiqa va sanʼat maktablarida o‘qituvchilik faoliyati bilan shug‘ullanish huquqi beriladi.

2026 yil 1 iyuldan tajriba tariqasida Qoraqalpog‘iston Respublikasi, viloyatlar va Toshkent shahrida bittadan “Madaniyat mehmonxonasi” madaniy klasteri investitsiya loyihasi (investitsiya loyihasi) amalga oshiriladi.

Parvarishlash nafaqasi tayinlanadigan shaxslar toifasi kengaytiriladi

Farmonga ko‘ra, 2026 yil 1 sentyabrdan 18 va undan katta yoshdagi chuqur darajadagi aqliy zaiflik tashxisi qo‘yilgan shaxslarning parvarishi bilan band bo‘lgan qonuniy vakilga o‘zgalar parvarishiga muhtoj nogironligi bo‘lgan 18 yoshgacha bolalarning parvarishi bilan band bo‘lgan bolaning qonuniy vakiliga beriladigan nafaqa miqdorida har oyda parvarishlash nafaqasi beriladi. 

Nogironligi bo‘lgan shaxslar uchun “Muruvvat” internat uylari nogironligi bo‘lgan shaxslar uchun “G‘amxo‘rlik” markazlari etib qayta nomlanadi.

Agentlik huzurida Nogironligi bo‘lgan shaxslarga ijtimoiy xizmatlar ko‘rsatilishini muvofiqlashtirish markazi tashkil etiladi.

2026 yil 1 maydan “G‘amxo‘rlik” markazlariga quyidagi toifadagi shaxslar qabul qilinadi:

► Psixologik-tibbiy-pedagogik komissiya xulosasiga muvofiq joylashtirilishi belgilangan nogironligi bo‘lgan bolalar;

► oila aʼzolari, shuningdek, yaqin qarindoshlari mavjud bo‘lmagan va o‘z egaligida turarjoyga ega bo‘lmagan yoki yashash uchun yaroqsiz holatdagi turarjoyda yashayotgan o‘zgalar parvarishiga muhtoj ruhiy holati buzilgan I va II guruh nogironligi bo‘lgan shaxslar;

► yuqoridagi toifaga kirmaydigan ruhiy holati buzilgan I va II guruh nogironligi bo‘lgan shaxslar.

“G‘amxo‘rlik” markazlarida ijtimoiy xizmat ko‘rsatishning quyidagi yangi tartibi joriy etiladi:

♦ ruhiy holati buzilgan nogironligi bo‘lgan shaxslar ijtimoiy yondashuv asosida sport, ijodiy, ergoterapiya mehnat va ijtimoiy-maʼnaviy terapiyaga jalb etish orqali reabilitatsiya qilinadi;

♦ ruhiy holati buzilgan nogironligi bo‘lgan shaxslarni mustaqil hayotga tayyorlashga qaratilgan “Murabbiy kuzatuvida” mustaqil yashash xizmati yo‘lga qo‘yiladi.