Parlament so‘rovi "Xavfsiz va uzluksiz yo‘l" dasturini amalga oshirish, radarlar samaradorligini tahlil qilish va mavjud muammolarni bartaraf etish masalalarini o‘z ichiga oladi.

Deputatlar tomonidan Ichki ishlar vaziri Aziz Toshpo‘latovga "Avtomobil yo‘llarida foto va video qayd etish texnik vositalarining yo‘l harakati xavfsizligini taʼminlashdagi samaradorligi hamda sohaga axborot texnologiyalarini joriy etish borasida amalga oshirilayotgan ishlar to‘g‘risida"gi parlament so‘rovi yuborildi.

Zamonaviy kameralar va radarlar qoidalarga rioya etilishini nazorat qilishning taʼsirchan vositasi bo‘lib, haydovchilar intizomini oshirish, qoidabuzarliklar va YTHlar sonini kamaytirish, shuningdek, sohada korrupsiya holatlarining oldini olishga xizmat qilishi taʼkidlandi.

Shu bilan birga, fuqarolar ularning ishiga oid ayrim eʼtirozlarni bildirmoqdalar:

- ruxsat etilgan tezlik keskin o‘zgaradigan uchastkalarda yo‘l belgilari yetarlicha ko‘zga tashlanmaydigan tarzda o‘rnatilgan;

- Foto va video qayd etish tizimlari maʼlumotlarini qayta ishlashda jarimalarni hisoblashda texnik xatoliklarga yo‘l qo‘yilmoqda, bu esa maʼmuriy jazolarning asossiz qo‘llanilishiga olib kelmoqda;

- ayrim yo‘llarning sifati talabga javob bermaydi, yo‘l belgilari yaxshi ko‘rinmaydi yoki noto‘g‘ri chizilgan, bu esa o‘z navbatida yo‘l harakati qoidalarining buzilishiga olib keladi;

- piyodalar o‘tish joylarida svetoforlar yetishmaydi.

IIVga "Xavfsiz va uzluksiz yo‘l" umummilliy dasturining ijrosi, yo‘l infratuzilmasini rivojlantirish loyihalarini moliyalashtirish, foto va video qayd etish tizimlarining samaradorligi va natijadorligini tahlil qilish, shuningdek, yo‘l harakati xavfsizligini taʼminlash sohasidagi mavjud muammo va kamchiliklarni bartaraf etish masalalari yuzasidan asoslantirilgan tushuntirishlar berish talabi bilan parlament so‘rovi yuborilgan.