Yandex Uzbekistan Toshkentda real vaqt rejimida svetofor signallarini ko‘rsatish qamrovini uch barobarga kengaytirdi va navigatsiya xizmatlariga signal almashish taymerlarini qo‘shdi. Endi maʼlumotlar 300 dan ortiq svetofor uchun mavjud: haydovchilar joriy signaldan tashqari, uning qachon o‘zgarishini ham ko‘rishi mumkin.

Yangilanish Yandex Maps va Navigator ilovalarida, shuningdek, xizmatlarning Apple CarPlay va Android Auto versiyalarida ishlaydi. Maʼlumotlar real vaqt rejimida uzatiladi va haydovchilarga chorrahadagi vaziyatni oldindan bilish imkonini beradi.

Ushbu funksiya, ayniqsa, orqa hisob taymerlari o‘rnatilmagan svetoforlarda foydali bo‘ladi. Haydovchilar svetofor fazalari haqida qo‘shimcha maʼlumotga ega bo‘lib, stop-chiziq oldida harakatni aniqroq rejalashtirishi mumkin.

Loyiha Toshkent shahar hokimligi, O‘zbekiston Respublikasi Ichki ishlar vazirligi hamda Toshkent shahar Yo‘l harakatini tashkil etish markazi ko‘magida amalga oshirildi.

«Haydovchilar uchun yo‘ldagi vaziyat haqidagi maʼlumotlar qancha ko‘p bo‘lsa, qaror qabul qilish shuncha osonlashadi. Navigatsiya xizmatlarida svetofor signallarining aks etishi haydovchilarga chorrahalarda yaxshiroq mo‘ljal olish va joriy vaziyatni hisobga olish imkonini beradi», – dedi Toshkent shahar hokimining transport va yo‘l-transport infratuzilmasini rivojlantirish masalalari bo‘yicha o‘rinbosari Abdurahmon Baxtiyev.

Kompaniya tomonidan o‘tkazilgan foydalanuvchilar tadqiqoti natijalariga ko‘ra, haydovchilarning 88 foizi navigatsiyada svetofor signallarini ko‘rsatish funksiyasidan faol foydalanadi. Shuningdek, ishtirokchilarning 63 foiziga ko‘ra, bu maʼlumot harakatni yana-da bashorat qilinadigan qiladi. 48 foiz haydovchilar o‘zini rulda xavfsizroq his qilishini, 51 foiz esa safarlar xotirjamroq kechishini taʼkidlagan.

Svetofor fazalari haqidagi maʼlumotlardan foydalanish manzilga yetib borish vaqtini ham aniqroq hisoblash imkonini beradi. Marshrut tuzishda o‘rtacha kutish vaqti emas, balki yo‘ldagi joriy vaziyat hisobga olinadi.

Toshkent Yandex Uzbekistan navigatsiya xizmatlarida svetoforning joriy signali haqidagi maʼlumotlar joriy etilgan ilk shaharlardan biriga aylandi. Kelgusida qamrovni kengaytirish va qo‘shimcha svetofor obyektlarini tizimga ulash rejalashtirilgan.